പ്രാര്‍ത്ഥനാമണിദാനം കേട്ടുണരുന്നു വിണ്ണില്‍

പ്രണവംനേരില്‍ കേട്ടാലെന്നപോലൊരു താരം,

തീവണ്ടിപ്പാളങ്ങളില്‍ ചെണ്ടകള്‍ കൊട്ടിപ്പായും

തീര്‍ത്ഥകന്‍ പുകവണ്ടി-

യെന്‍ കര്‍ണം ഭേദിക്കവേ,

വിണ്ണിലെച്ചിറകുകള്‍ വീശുന്ന വെള്ളിപ്പൂക്കള്‍

കണ്ണിലും മനസ്സിലുമാനന്ദം വിടര്‍ത്തുന്നു...

രാവിലെ വിരുന്നുകാരീപ്പൂക്കള്‍;

മനസ്സിന്‍റെ കോവിലില്‍ കൊളുത്തുന്നു

നിര്‍വൃതി നിലാത്തിരി

അങ്കണത്തൈമുല്ലയില്‍ വിടരുംപൂക്കള്‍ വന്നെന്‍

പൂങ്കവിള്‍ തലോടിയെന്‍ മനസ്സില്‍ മന്ത്രിക്കുന്നു:

"ജീവിതത്തിനുശാന്തി-

യേകാന്തഗൃഹാങ്കണഭൂവിലല്ലയോ?

രാഗമൂകമാമനുഭൂതി!..."

നിത്യസൗന്ദര്യത്തിന്‍റെ തൂമുഖം ദര്‍ശിക്കുവാന്‍

നിത്യവും മുറ്റത്തുള്ള

പൂക്കള്‍ നാം ദര്‍ശിച്ചെങ്കില്‍!