മദ്യപാനം തലച്ചോറിനെ നശിപ്പിക്കുമോ?
'ഒരു പെഗ്ഗില് തുടങ്ങുന്ന യാത്ര... ഒടുവില് സ്വന്തം തലച്ചോറിനെ നഷ്ടപ്പെടുത്തുന്ന കഥ!' അമിതമായ മദ്യപാനം തലച്ചോറിനെ നിശ്ശബ്ദമായി എങ്ങനെയാണ് നശിപ്പിക്കുന്നത്?
'എനിക്ക് എപ്പോള് വേണമെങ്കിലും മദ്യം നിര്ത്താന് കഴിയും...'
മദ്യാസക്തിയുള്ള അനേകം ആളുകളുടെ ഏറ്റവും സാധാരണമായ വാചകമാണിത്.
എന്നാല് ഒരു ചോദ്യം ചോദിക്കട്ടെ: 'നിങ്ങളാണോ മദ്യം കുടിക്കുന്നത്... അതോ മദ്യം ക്രമേണ നിങ്ങളുടെ തലച്ചോറിനെ കുടിച്ചുതീര്ക്കുകയാണോ?'
മദ്യത്തിന്റെ ഏറ്റവും വലിയ അപകടം അത് ഒരു ദിവസംകൊണ്ട് ജീവിതം തകര്ക്കുന്നില്ല എന്നതാണ്. ഒരു പെഗ്ഗില് തുടങ്ങുന്ന ശീലം വര്ഷങ്ങള്ക്കുശേഷം ഓര്മ്മകളെ, തീരുമാനങ്ങളെ, വ്യക്തിത്വത്തെ, ബന്ധങ്ങളെ, ഒടുവില് തലച്ചോറിനെ തന്നെ മാറ്റിമറിക്കുന്നു. ഏറ്റവും ദുഃഖകരമായ കാര്യംഈ മാറ്റങ്ങള് പലപ്പോഴും വളരെ വൈകിയാണ് തിരിച്ചറിയപ്പെടുന്നത്.
* എന്തുകൊണ്ടാണ് എല്ലാവര്ക്കും ഒരുപോലെ അപകടമില്ലാത്തത്?
മദ്യം എല്ലാവരെയും ഒരേ രീതിയില് ബാധിക്കില്ല. അപകടസാധ്യത നിര്ണയിക്കുന്നത് പല ഘടകങ്ങളാണ്.
-പൊതുവായ ആരോഗ്യനില
-എത്ര അളവിലും എത്ര തവണയും മദ്യം കഴിക്കുന്നു
-എത്ര വര്ഷമായി മദ്യപിക്കുന്നു
-പ്രായം, ലിംഗം, ജനിതക ഘടകങ്ങള്, കുടുംബചരിത്രം
-പോഷകാഹാരക്കുറവ്
-ഗര്ഭകാലത്ത് മദ്യപാനം
എന്നാല് ഒരു കാര്യം ഉറപ്പാണ്അമിതമായ മദ്യപാനം തലച്ചോറിന് സുരക്ഷിതമല്ല.
* മദ്യം തലച്ചോറിനെ എങ്ങനെ കീഴടക്കുന്നു?
മദ്യം ആദ്യം കീഴടക്കുന്നത് നമ്മുടെ ശരീരത്തെയല്ല... നമ്മുടെ തലച്ചോറിനെയാണ്.
നമ്മുടെ തലച്ചോറിലെ കോടിക്കണക്കിന് ന്യൂറോണുകള് പരസ്പരം സന്ദേശങ്ങള് കൈമാറിയാണ് ചിന്തയും ഓര്മ്മയും വികാരങ്ങളും ശരീരത്തിന്റെ എല്ലാ പ്രവര്ത്തനങ്ങളും നിയന്ത്രിക്കുന്നത്. മദ്യം ഈ സന്ദേശവിനിമയത്തെ തകര്ക്കുന്നു.
ഫലമായി. ചിന്ത മന്ദഗതിയിലാകുന്നു, ഓര്മ്മശക്തി കുറയുന്നു, ശ്രദ്ധയും ഏകാഗ്രതയും നഷ്ടപ്പെടുന്നു, ശരിയായ തീരുമാനങ്ങള് എടുക്കാനുള്ള കഴിവ് കുറയുന്നു, പ്രതികരണവേഗം കുറയുന്നു. വര്ഷങ്ങളോളം അമിതമായി മദ്യപിച്ചാല് തലച്ചോറിലെ ചില ഭാഗങ്ങള് ചുരുങ്ങുകയും സ്ഥിരമായ കോശനാശം സംഭവിക്കുകയും ചെയ്യാം.
മൂന്ന് ഘട്ടങ്ങള്... ആസക്തിയിലേക്കുള്ള അപകടകരമായ യാത്ര
1. ടോളറന്സ് (Alcohol Tolerance)
ആദ്യകാലത്ത് ഒരു ചെറിയ അളവില് ലഭിച്ച ലഹരി പിന്നീട് ലഭിക്കണമെങ്കില് കൂടുതല് മദ്യം ആവശ്യമായി വരുന്നു.
ഇത് ശരീരത്തിന്റെ ശക്തിയല്ല... തലച്ചോര് അപകടകരമായി പൊരുത്തപ്പെടുന്നതിന്റെ ആദ്യ ലക്ഷണമാണ്.
2. ഡിപെന്ഡന്സ് (Alcohol Dependence)
ഒരു ഘട്ടം കഴിഞ്ഞാല് മദ്യം ഒരു ശീലമല്ല, ആവശ്യമായി മാറുന്നു. മദ്യം ഇല്ലാതെ സാധാരണ ജീവിതം പോലും അസാധ്യമായി തോന്നുന്നു.
3. വിത്ഡ്രോവല് (Alcohol Withdrawal‑)
മദ്യാസക്തിയുള്ള ഒരാള് പെട്ടെന്ന് മദ്യം നിര്ത്തുമ്പോള് അമിതവിയര്പ്പ്, കൈവിറയല്, ഹൃദയമിടിപ്പ് വര്ധിക്കല്, ഉത്കണ്ഠ, ഉറക്കക്കുറവ്, അപസ്മാരം എന്നിവ ഉണ്ടാകാം. ഗുരുതരമായാല് ഡെലിറിയം ട്രെമെന്സ് (Delerium Tremens‑‑) എന്ന ജീവന് ഭീഷണിയായ അവസ്ഥയിലേക്കും എത്താം.
* ഒരു രാത്രികൊണ്ട് സംഭവിക്കാവുന്ന ദുരന്തങ്ങള്
അമിതമായി മദ്യം കഴിച്ചതിനുശേഷം ഛര്ദ്ദി, ബോധക്ഷയം, അപസ്മാരം, ശരീരതാപനില കുറയല്, അപകടകരമായ വാഹനാപകടങ്ങള്, ബ്ലാക്ക് ഔട്ട് (ഓര്മ്മയിലെ വിടവുകള്), തെറ്റായ തീരുമാനങ്ങള്, സുരക്ഷിതമല്ലാത്ത പെരുമാറ്റങ്ങള് എന്നിവ ഉണ്ടാകാം. ഗുരുതരമായ മദ്യവിഷബാധ മരണത്തിനും മസ്തിഷ്കനാശത്തിനും കാരണമാകാം.
* വര്ഷങ്ങളോളം മദ്യപിച്ചാല് തലച്ചോറില് എന്ത് സംഭവിക്കും?
ദീര്ഘകാല മദ്യപാനം തലച്ചോറിലെ കോശങ്ങളെ നശിപ്പിക്കുകയും പഠനശേഷി, ഓര്മ്മ, ഏകാഗ്രത എന്നിവയെ ഗുരുതരമായി ബാധിക്കുകയും ചെയ്യുന്നു.
വിറ്റാമിന് B1 കുറവുമൂലം ഉണ്ടാകുന്ന വെര്ണിക്കെകോര്സകോഫ് സിന്ഡ്രോം (Wernicke-Korsakoff syndrome‑) എന്ന രോഗം ഡിമെന്ഷ്യ പോലുള്ള ഓര്മ്മപ്രശ്നങ്ങള്ക്കും പഠനവൈകല്യങ്ങള്ക്കും കാരണമാകും.
* ഗര്ഭകാലത്ത് ഒരു ഗ്ലാസ് പോലും സുരക്ഷിതമാണോ?
ഇന്നുവരെ ഒരു പഠനവും ഗര്ഭകാലത്ത് 'സുരക്ഷിതമായ' മദ്യത്തിന്റെ അളവ് കണ്ടെത്തിയിട്ടില്ല. ഗര്ഭസ്ഥ ശിശുവിന്റെ തലച്ചോറിന്റെ വളര്ച്ചയെ ബാധിക്കുന്ന Fetal Alcohol Spectrum Disorders (FASD) ഉണ്ടാകാനുള്ള സാധ്യതയുണ്ട്. അതുകൊണ്ട് ഗര്ഭകാലത്ത് മദ്യം പൂര്ണമായും ഒഴിവാക്കുന്നതാണ് ഏറ്റവും സുരക്ഷിതം.
* മസ്തിഷ്കത്തിന് മാത്രമല്ല... ശരീരം മുഴുവന് അപകടത്തില്
അമിതമായ മദ്യപാനം വര്ധിക്കുന്നത്...
- കരള്രോഗം, സിറോസിസ്
- പാന്ക്രിയാറ്റൈറ്റിസ്
- ഹൃദ്രോഗം
- ഉയര്ന്ന രക്തസമ്മര്ദ്ദം
- നാഡീക്ഷതം (ആല്ക്കഹോളിക് ന്യൂറോപ്പതി)
-പ്രതിരോധശേഷി കുറയല്
-അന്നനാളം, കരള്, വന്കുടല്, സ്തനം എന്നിവയിലെ അര്ബുദങ്ങള്
കരള് ഗുരുതരമായി തകരുമ്പോള് ഹെപ്പാറ്റിക് എന്സെഫലോപ്പതി ഉണ്ടായി ആശയക്കുഴപ്പം, ഓര്മ്മക്കുറവ്, വ്യക്തിത്വമാറ്റം, കോമ എന്നിവ വരെ സംഭവിക്കാം.
* സ്ത്രീകള് കൂടുതല് അപകടസാധ്യതയിലാണോ?
അതെ. സ്ത്രീകളില് കരള്, ഹൃദയം, നാഡീവ്യൂഹം, തലച്ചോര് എന്നിവയ്ക്ക് പുരുഷന്മാരേക്കാള് വേഗത്തിലും ഗുരുതരമായും കേടുപാടുകള് സംഭവിക്കുമെന്ന് നിരവധി പഠനങ്ങള് സൂചിപ്പിക്കുന്നു. ഒരേ അളവില് മദ്യം കഴിച്ചാലും സ്ത്രീകളില് രക്തത്തിലെ ആല്ക്കഹോള് സാന്ദ്രത കൂടുതലാകാറുണ്ട്. ശരീരത്തിലെ ജലാംശം കുറവായതും ആല്ക്കഹോള് വിഘടിപ്പിക്കുന്ന എന്സൈമിന്റെ അളവ് താരതമ്യേന കുറവായതുമാണ് പ്രധാന കാരണം.
* എല്ലാ മദ്യപാനവും ദോഷകരമാണോ?
അല്ല. ചിലര് പ്രത്യേക സാമൂഹിക അവസരങ്ങളില് (Social Drinking‑) നിയന്ത്രിതമായ അളവില് മാത്രം മദ്യം ഉപയോഗിക്കുകയും അതില് തന്നെ നിര്ത്തുകയും ചെയ്യുന്നു. ചില അന്തര്ദേശീയ മാര്ഗ്ഗനിര്ദേശങ്ങള് പ്രകാരം, ആരോഗ്യവാനായ മുതിര്ന്നവരില് സ്ത്രീകള്ക്ക് പ്രതിദിനം ഒരു സ്റ്റാന്ഡേര്ഡ് ഡ്രിങ്കിലും പുരുഷന്മാര്ക്ക് പരമാവധി രണ്ട് സ്റ്റാന്ഡേര്ഡ് ഡ്രിങ്കിലും കൂടുതല് കഴിക്കരുതെന്നാണ് നിര്ദേശം.
എന്നാല് മദ്യം പൂര്ണമായും അപകടരഹിതമാണെന്ന് പറയാന് കഴിയില്ല.
ഗര്ഭിണികള്, കരള്രോഗമുള്ളവര്, മദ്യാസക്തിയുള്ളവര്, വാഹനമോടിക്കുന്നവര്, മദ്യവുമായി പ്രതികരിക്കുന്ന മരുന്നുകള് കഴിക്കുന്നവര് എന്നിവര് മദ്യം പൂര്ണമായും ഒഴിവാക്കണം.
* തലച്ചോറിന് വീണ്ടും സുഖം പ്രാപിക്കാനാകുമോ?
ഇതാണ് പ്രതീക്ഷ നല്കുന്ന വാര്ത്ത. മദ്യപാനം പൂര്ണമായി നിര്ത്തുകയും ചികിത്സയും കൗണ്സിലിംഗും പോഷകാഹാരവും സ്വീകരിക്കുകയും ചെയ്താല് പലരിലും ഏതാനും മാസങ്ങള് മുതല് ഒരു വര്ഷത്തിനുള്ളില് തലച്ചോറിന്റെ പ്രവര്ത്തനത്തില് ശ്രദ്ധേയമായ മെച്ചപ്പെടല് കാണാം. അതുകൊണ്ട് സഹായം തേടാന് ഒരിക്കലും വൈകിയിട്ടില്ല.
* ഓര്ക്കുക...
മദ്യത്തിന്റെ ഏറ്റവും വലിയ ഇര കരളല്ല... തലച്ചോറാണ്. എന്നാൽ അതിലും വലിയ ഇര ആ വ്യക്തിയെ സ്നേഹിക്കുന്ന കുടുംബമാണ്. മദ്യാസക്തി ഒരാളുടെ മാത്രം രോഗമല്ല; അത് ഒരു കുടുംബത്തിന്റെ നിശ്ശബ്ദ ദുരന്തമാണ്. കുട്ടികളുടെ ബാല്യം, മാതാപിതാക്കളുടെ സമാധാനം, ജീവിതപങ്കാളിയുടെ വിശ്വാസം, കുടുംബത്തിന്റെ സാമ്പത്തിക സുരക്ഷ ഇവയെല്ലാം പതിയെ തകര്ക്കാന് മദ്യത്തിന് കഴിയും.
ഒന്നോ രണ്ടോ പെഗ് മദ്യം ഒരു ജീവിതം മാറ്റണമെന്നില്ല. എന്നാല് നിയന്ത്രണം നഷ്ടപ്പെട്ട മദ്യപാനം ഒരു മനുഷ്യനെയും, ഒരു കുടുംബത്തെയും, ചിലപ്പോള് ഒരു തലമുറയുടെ ഭാവിയെയും മാറ്റിമറിച്ചേക്കാം.
ഇന്ന് എടുക്കുന്ന ഒരു തീരുമാനം മദ്യം നിയന്ത്രിക്കുകയോ പൂര്ണമായി ഉപേക്ഷിക്കുകയോ ചെയ്യുക നമ്മുടെ തലച്ചോറിനും കുടുംബത്തിനും നല്കാവുന്ന ഏറ്റവും വിലപ്പെട്ട സമ്മാനമായിരിക്കും. കാരണം, നഷ്ടപ്പെട്ട പണവും സ്ഥാനവും ഒരുപക്ഷേ തിരികെ നേടാം. എന്നാല് മദ്യത്തില് നഷ്ടപ്പെട്ട ഓര്മ്മകളും, ബന്ധങ്ങളും, വിശ്വാസവും, ജീവിതത്തിലെ വിലപ്പെട്ട വര്ഷങ്ങളും ഒരിക്കലും തിരികെ ലഭിക്കില്ല.
ഒരു ചോദ്യം മാത്രം സ്വയം ചോദിക്കൂ: 'ഇന്നത്തെ ഈ ഒരു പെഗ്, ഞാന് ഏറ്റവും കൂടുതല് സ്നേഹിക്കുന്നവരില് നിന്ന് എന്നെ പതിയെ അകറ്റുകയാണോ?'
മദ്യപാനം തലച്ചോറിനെ നശിപ്പിക്കുമോ?
ഡോ. അരുണ് ഉമ്മന്
സീനിയര് കണ്സള്ട്ടന്റ്
ന്യൂറോ സര്ജന്
ലേക്ഷോര് ഹോസ്പിറ്റല്, കൊച്ചി
