വീടിനുള്ളിലെ സംസാരം മുറിവായി മാറിയതു കൊണ്ട് നമുക്കെത്ര പേരെ നഷ്ടപ്പെട്ടു! നാടുവിട്ടവര്‍. മരണം വരിച്ചവര്‍. ലഹരിയില്‍ ഒടുങ്ങിയവര്‍. പകയില്‍ നീറുന്നവര്‍. സ്നേഹത്തിന്‍റെ ഉറവക്കണ്ണുകള്‍ അടഞ്ഞു പോയവര്‍. നല്ല അപ്പനാകാനും നല്ല അമ്മയാകാനും, നല്ല ഭാര്യയാകാനും നല്ല ഭര്‍ത്താവാകാനും, നല്ല മകനും മകളുമാകാനും കഴിയാതെ പോകുന്നവര്‍. എല്ലാത്തിന്‍റെയും അടിസ്ഥാനം വീടിനുള്ളില്‍ രൂപപ്പെടുന്ന സംസാര ശൈലികളാണ്.

തങ്ങള്‍ ജീവിക്കുന്ന സമൂഹത്തിലെ സംസാരങ്ങള്‍ക്കും സംഭാഷണങ്ങള്‍ക്കും കുഞ്ഞുങ്ങളുടെ വളര്‍ച്ചയില്‍ വലിയ പങ്കുണ്ട്. ഒരു കുട്ടി ഭാഷ പഠിക്കുന്നതുമുതല്‍ സാമൂഹികബന്ധങ്ങള്‍ കെട്ടിപ്പടുക്കുന്നതുവരെ ഈ സ്വാധീനം നീളുന്നു. മുതിര്‍ന്നവര്‍ പരസ്പരം സംസാരിക്കുന്നത് കേള്‍ക്കുമ്പോഴാണ് വാക്കുകള്‍ എവിടെ എങ്ങനെ ഉപയോഗിക്കണമെന്ന് അവര്‍ പഠിക്കുന്നത്. കുട്ടികള്‍ സ്വാഭാവികമായും അനുകരണശീലമുള്ളവരാണ്.