രചനയുടെ ആരംഭത്തിന്റെ 800-ാം വാര്ഷികം
A. ആമുഖം
ഫ്രാന്സിസ്കന് രചനകളില് സൂര്യകീര്ത്തനവും, സാന്ഡാമിയനോയിലെ സന്യാസിനികള്ക്കുള്ള ആഹ്വാനവും, സഹോദരന് ലിയോയ്ക്കുള്ള ആശീര്വാദവും അതേ തുകലിന്റെ (Parchment) മറുപുറത്തുള്ള ദൈവത്തിന്റെ സ്തുതിപ്പും Umbrian ഭാഷയിലാണ്; മറ്റെല്ലാം ലത്തീനിലും.
സൂര്യകീര്ത്തനത്തിന്റെ രചന ആരംഭിക്കുന്നതായി പറയപ്പെടുന്നത് 1225 ആണെ ങ്കിലും അതിനു മുമ്പു തന്നെ ഈ ചിന്തകള് ഫ്രാന്സിസിന്റെ ഉള്ളില് രൂപപ്പെട്ടുകാണണം. ഇതിനു മുമ്പുള്ള പല രചനകളിലും (ഉദാഹരണം: യാമപ്രാര്ത്ഥനയ്ക്കു മുമ്പ് ചൊല്ലേണ്ട സ്തുതിപ്പുകള്) ഇതു വ്യക്തമാണ്. ഫ്രാന്സിസ് തന്റെ ഇരുപതാം വയസ്സിനു ശേഷം ആയിരിക്കണം സാന്ഡാമിയാനോ പള്ളിയും പരിസരവും പുനര്നിര്മിച്ചത്. തീരെ വയ്യാത്ത അവസ്ഥയില്, ശാരീരികമായും മാനസികമായും ആത്മീയമായും തളര്ന്ന അവസ്ഥയില് അവിടെ വച്ചുതന്നെയാണ് സൂര്യകീര്ത്തനത്തിന്റെ ഭാഗങ്ങള് രചിക്കപ്പെടുന്നത് എന്നു ചരിത്രകാരന്മാര് അഭിപ്രായപ്പെടുന്നു.
താഴെ പറയുന്ന ആദ്യകാലങ്ങളിലെ രചനകളില് (Early Documents) സൂര്യകീര്ത്തനത്തിന്റെ പരാമര്ശം കാണാം.
a) ഫ്രാന്സിസിന്റെ ജീവിതം വിവരിക്കുന്ന സലാനോയുടെ ആദ്യരചനയില് ഭാഗം: 81 (1 c, 81)
b) ഫ്രാന്സിസ്കന് സഹോദരരായ Angelo, Rufeno, Leo എന്നിവര് ചേര്ന്ന് എഴുതിയ Assisi Compilation. ഈ കൃതി തന്നെ പെറൂജിയയിലെ ലജന്ഡ് (Legend of Perugia) എന്ന പേരിലും അറിയപ്പെടുന്നു. (AC 7, 33, 84; LP 43, 44, 100).
c) സലാനോയുടെ രണ്ടാം രചനയില് (2 C 172, 213).
d) ഫ്രാന്സിസിന്റെ ജീവിതം വിവരിക്കുന്ന Bonavature യുടെ Major Legend (LMJ VIII 6; IX 4)
e) Paul Sabatier തര്ജമ ചെയ്ത പൂര്ണ്ണതയുടെ ദര്പ്പണം (Mirror of Perfection) (2MP 100, 101, 122-123)
Assisi Compilation ല് സൂര്യകീര്ത്തനത്തിന്റെ രചനയിലേക്ക് നയിക്കുന്ന സംഭവം വിവരിച്ചിരിക്കുന്നത് ഇപ്രകാരമാണ്: സാരസന്മാരുടെ നാട്ടിലേക്കുള്ള യാത്രയ്ക്കു (1220) ശേഷം പഞ്ചക്ഷതം ലഭിക്കുമ്പോഴും (1224) തുടര്ന്നും ഫ്രാന്സിസ് പല തരത്തിലുള്ള വ്യഥകളാല് പീഡിതനായിരുന്നു. ശരീരം ആസകലം വേദന, കാഴ്ച പരിമിതപ്പെട്ടു. രാവിലെ സൂര്യവെളിച്ചവും, രാത്രി തീയുടെ വെളിച്ചവും കണ്ണുകള്ക്ക് വേദനാജനകമായിരുന്നു. ഉറങ്ങുക ശ്രമകരമായിരുന്നു, അസാധ്യം എന്നു പറയാം. സാന്ഡാമിയാനോയിലെ പനമ്പുകൊണ്ടു തീര്ത്ത ഒരു കുടുസ്സുമുറിയിലായിരുന്നു. എലികള് ശല്യം ചെയ്യുമായിരുന്നു. തന്നോടുതന്നെ ഫ്രാന്സിസിന് സഹതാപം തോന്നിയ അവസ്ഥയില് ഇപ്രകാരം സാന്ത്വനം നല്കുന്ന വചനം ആത്മാവില് ശ്രവിക്കാന് ഇടയായി "സന്തോഷവാനാകൂ, ആനന്ദിക്കൂ. ഇപ്പോള് നീ സ്വര്ഗ്ഗരാജ്യത്തില് സുനിശ്ചിതമായ സ്ഥാനം നേടിയിരിക്കുന്നു."
ഈ ആന്തരിക വചസുകളാല് അതീവ സന്തോഷവാനായ ഫ്രാന്സിസ് ധ്യാനനിരതനായി ഇപ്രകാരം പറഞ്ഞുവത്രെ: 'ദൈവത്തിന്റെ (കര്ത്താവിന്റെ) പുകഴ്ച്ചക്കായി പുതിയ ഒരു കീര്ത്തനം രചിക്കും'. സൃഷ്ടവസ്തുക്കള് കര്ത്താവിനെ സ്തുതിക്കട്ടെ, ഇവ മനുഷ്യന് ആവശ്യമാണ്. ഇവയില് മനുഷ്യര് സ്രഷ്ടാവിനെ നിന്ദിക്കുകയും ചെയ്യുന്നു എന്നത് ഫ്രാന്സിസ് സ്വന്തമായി എഴുതിയതാകാന് സാധ്യത കുറവാണ്.